2 Kings 24
1 約雅敬在位年間，巴比倫王尼布甲尼撒侵犯猶大。約雅敬就投降服事佢三年，後來造反。
2 上主使巴比倫、敘利亞、摩押、㧯亞捫个軍隊來攻打約雅敬，消滅猶大，就像上主通過厥僕人眾先知所講个。
3 這事會發生，係因為上主个命令，為到愛逐走猶大个人民。這係因為瑪拿西王所犯一切个罪；
4 佢又㓾掉盡多無辜个人民，使耶路撒冷滿遍係血；上主毋肯赦免瑪拿西。
5 約雅敬其他个事全部記在《猶大列王史》底背。
6 約雅敬死掉後，厥孻仔約雅斤承接佢做王。
7 埃及王無再出兵到厥國家以外个地方；因為對埃及北部个細河壩到幼發拉底河這片土地以前係屬埃及个，這下全部被巴比倫王搶去了。
8 約雅斤十八歲个時做猶大王；佢在耶路撒冷統治三個月。厥姆安到尼護施她，係耶路撒冷人以利拿單个妹仔。
9 約雅斤學厥爸个壞模樣，行上主看做邪惡个事。
10 在該期間，巴比倫王尼布甲尼撒个大將帶領軍隊攻打耶路撒冷，包圍全城。
11 在佢个軍隊圍城期間，巴比倫王尼布甲尼撒親身來到。
12 猶大王約雅斤㧯厥姆、大臣、將軍、王宮个官員全部出來向巴比倫王投降。尼布甲尼撒在位第八年，佢捉到約雅斤，
13 將上主个聖殿㧯王宮肚所有个財寶帶到巴比倫去。佢將以色列王所羅門為聖殿肚所造一切个金器敲掉，就像上主所宣告个。
14 耶路撒冷人民㧯所有大官、勇士，總共有一萬人被尼布甲尼撒捉走。連有手藝个師傅㧯打鐵師傅也全部被佢捉走，只留下最窮苦个人。
15 尼布甲尼撒將約雅斤帶到巴比倫，也將厥姆、王后、王妃、太監、㧯猶大个領袖全部對耶路撒冷帶走。
16 尼布甲尼撒也將所有个軍人七千個，還有一千個有手藝个師傅㧯打鐵師傅，帶到巴比倫去；佢等全部係勇敢个戰士。
17 巴比倫王設立約雅斤个阿叔瑪探雅做猶大王，又㧯佢个名改做西底家。
18 西底家二十一歲个時做猶大王；佢在耶路撒冷統治十一年。厥姆安到哈慕她，係立拿城葉利米个妹仔。
19 西底家行上主看做邪惡个事，像約雅敬所做个共樣。
20 上主對耶路撒冷㧯猶大个人民發譴，對自家面前將佢等逐出去。